Taud-taod nang walay sagbot
sa daplin sa dalan.
Nagmala na lang ang tunaan..
Nag-uga na ang kahumayan.
Ug wa nay bisan usa ka mais
nga nagbarog sa daruhan....
Nipis na lang kaayo
ang agos sa tubig sa dakong sapa…
Sihag na ang kanhi
huot nga kalibonan.
Nahanaw na ang mga saging
nga nagpunsisok sa tiilan sa bungtod
Uga! Uga! Uga!
Uga ang tibuok kong kalibotan!
Wala nay tubig.
Walay kahoy,
sagbot ug tanom.
Wala nay bulak.
Wala nay bisan gamay na lang nga mugna
nga moturok pa ning akong kasingkasing!
Wala nay bulok ang kinabuhi,
sukad akong nasuta ug nahibaw-an
nga siya ug dili ako
ang matuod mong gihigugma.
sugilagming: bentaha
1 year ago
2 comments:
bitaw pait gyud ang huwaw. apan di lang ta pawa sa paglaum kay di man kanunay molungtad ang huwaw. may adlaw ra nga mobugsok ang makusog nga ulan nga maoy mobisbis sa mga tanum ug mopa-agos sa tubig sa mga sapa kay bawos-bawos man ang panahon. :))
kinsa man ang nasayod?
kinsa man ang adunay kahibalo
nga ang kamatuoran anaa dinha sa kamatuoran?
matuod nga ang katam-is
anaa sa kapait nga initlugang paliya,
ug ang gana anaa sa pinusaka'g siling utan tinunuan
ug ingnon tika
adunay bulawan ang deserto
adunay pilak ang ilawon sa yuta
adunay dyamante ang baba sa bulkan
adunay kalipay ang haw-ang nga dughan
kay matuod nahigugma kini
ug dili kini sa damgo lamang
Post a Comment