skip to main |
skip to sidebar
niadtong wala pa ko mahigmata
Levi's pa akong karsones
niadtong wa pa ko huwasi sa kahubog
magpunay lang ko'g iningles
niadtong gubot pa akong huna-huna
langyaw pa gyod akong pangsinena
karong nahigmata na akong kalag
ako nalisod ug nagkasaag-saag
ang mga butang kabilin sa akong katigulangan
mora ug bag-o ko pang nakaplagan
sama sa atong pinulongan
ingon sa karon ko lang nakat-unan
sama sa batang walay buot
nagslisod paglitok ug sa pagsabot
hinuon wa man ko magbasul
apan dako ang akong kahasul
kay lisod man gud ang pagpahiuli
sa dugukan nga niagi nag kabali
di man unta dautan
ang pagtuon sa langyawng binuhatan
apan di lang unta kalimtan
tinuorayng ato gayod nga mga naandan.
nagpasad ang hugaw
sa lapyahan nga kanhi limpyo ug malinawon
natabunan ang mananoy nga
huni sa hangin ug mga balud sa paghot sa mga iro
nga midagsang sa baybayon
nanghasi sila sa tibuok hunasan
gitugaw ang mga isda ug kinhason sa takut
nagsugod kini dihang mipabuhagay si inday
sa alimyon sa madanihon niyang kahumot
ug nasubay ni manoy ang gigikanan niini
walay imik ang tanang nagpuyo sa baybayon
wala silay mahimo sa kahugawan nga dala ni manoy
nausab na karon ang templa sa ilang mga balak
uban sa pagkahanaw sa kaputli ni inday
Eleksyon na usab..
Alegre ug malingaw na sad ang katawhan.
Daghang pasundayag, daghang artista,
ug magkadaiyang "campaign jingles” ang madungog
sa radyo, television ug sa mga sakyanan
nga maglibot-libot sa kadalanan;
magpasad na unya ang mga campaign materials,
posters, leaflets, ug uban pang mahunahunaan sa mga kandidato
nga pamaagi aron pagdani sa pagtagad sa mga botante.
Eleksyon na!
Apan ambot kinsay angay botaran.
Ambot maayo pa ba kahang moapil niining maong kalihokan.
Ambot unsay kaayohan nga makuha nato ini. Ambot!
Eleksyon na?
Kinsa may mag-presidente, mag-senador,
mag-congressman, mag-gobernador , mag-mayor ug magkonsehal?
Ganahan ka? Apil !
Apil sa bangga sa mga buot makaanggkon ug gahum!
Apil sa linya sa mga buot mousab sa atong kahimtang!
Apil sa mga di buot ug kausaban.
Pagpili lang asa ka.
Deskurso.
Saad. Gasto. Pahiyom.
Panglamano. Pabilib. Pa-cute.
Pakita nga mahigugmaon ka sa mga kabus,
sa kabataan, sa mga tigulang, sa mga dinaug-daog,
sa mga mamumuo, sa mga mangingisda, sa mga mag-uuma,
sa kalikupan, sa demokrasya, sa nasud,
sa Dios.
Pamakak o Sulti sa tinuod.
Panikas o Pagtinarong.
Buhata ang tanan aron lang motuo ang katawhan
nga angayan kang ibutang sa katungdanan.
Eleksyon gud ron, na hala kumbate!
Inigkatapos na unya sa lumba,
Sa dihang molugdang na ang mga abog ug alintabo,
magpadayon ang katawhan
sa naandang pag-antus,
samtang sugdan dayon ninyo
ang pag-andam alang sa sunod eleksyon.