pasahero

bisan unsa pa man
ang imong buhaton
magpadayon gihapon
sa pagtuyok ang kalibotan

dili ka makapakusog sa tuyok
dili sad ka makapahunong niini

kay dili man ikaw ang drayber
unya daghan sad ang nanakay
nga nagtuo sab nga drayber sila

apan pasahero ra tang tanan

mensahe

nanghulam ka ug mga pulong
ug gipaambit mo sa katawhan
miyango-yango ug miuyon sila niini
daghang nakadayeg kanimo

ug samtang namalandong sila
sa unod sa imong mga mensahe
nagkalingaw usab ikaw sa pakig-uban
sa babayeng imong hinulaman

ako kini

ayaw kauwaw
nga mopadayag
sa imong gibati

ayaw kahadlok
nga moyagyag
sa imong tinaguan

ayaw kabalaka
nga moangkon
sa mga kasaypanan

gawasnon ka
nga mopakita
sa imong pagka-ikaw

ako kining gikaatubang mo

4 u

para nimo
lang kini

dili ni
alang niya
nga gituhoan
nimo nga
ako kunohayng
special someone

4 u
ra gyud
matud pa

mao lage
way lain

suod ta
bisag saon
tuo lang

way lain
ikaw ra

duha duha
pa jud

kausaban

tungod lang sa pahiyum
ug sa mga saad
padayunon ko ang paglawig
ning lawod sa mga kasamok
mao kanay hukom ko kaniadto

apan ang kwanggol lamang
and di maantigong mousab
sa iyang hunahuna

consummatum est
natapos na

pagkatapos sa ulan

lapad ug lawom ang lawod
sa akong mga pagbati

apan mohubas ra kini
pagkatapos sa ulan

sa ulan nga ako ra usab
ang nagpabuhagay