ang hinungdan

dili hangin
ang nakapatikwang sa atong sakayan
wala gani labot ang mga balud niini

nayabo kita dihang mibalhin ka ug lingkod
gikan sa akong atbang ug misabak sa akong paa

ug dili sab tungod kay sa unsa lang hinungdan
nga naingon ka niadto

dili gugma
ang nag-aghat kanimo nga mo-uban kanako
wala gani labot ang kaayohan natong duha niini

kaikag sa paghimo ug balak
balak nga makahubog sama sa alak
maoy nagtukmod kanimo

kaulag sa paggaray ang hinungdan
way laing kapasanginlan.

sa baybayon ug lasang

Halapad ang wanang sa baybayon
buhi ang hunasan

may balak nga makinhas
ilawom sa mga bato
sa balas ug sa mga lim-aw

sa akong pag-aninaw
wala nay balak alang kanako

buhi ang baybayon
buhi ang hunasan
apan dili na kini alang kanako

nakahukom ako karon
nga motungas sa bukid
mosuot sa lasang
mangayam

kaamgohan

Walay damgo
nga molungtad.

Kon kahayag sa adlaw
di mahawiran,
labaw nga di makumkon
ang kasanag sa buwan

usahay kaniadto

usahay kaniadto
buot natong kumkumon
ang gabon

buot higupon
yamog sa kabuntagon

buot hagkan
ang langit

buot hawiran
ang adlaw

buot hakpon
sanag sa buwan

buot puy-an
ang damgo

himuong kamatuoran
ang handurawan


usahay
ra kadto
kaniadto

karon wala na
tungod kay
natapos na

soulmate

Mga kalag nga kaabay
sa usa ka higayon magkatagay
magsalo sa kalipay
maghigugmaay

usa ray kinabuhi sa tawo
kon mohalin man
wala nay balikon pa
walay kalag magkundena

ang duha ka kalag nga kaabay
tiunay nga maghigugmaay
sa matarung nga dalan magasubay
inig katapos walay pagmahay

walay gugma sulod sa damgo
walay damgo diha sa gugma
ang nagdamgo di maantigong mahigugma
ang nahigugma wala magdamgo

soulmate ba kamo?
kamo ray nasayod
kamo ray magsabot
kamo ra sad niini ang maghimo