unsaon na lang

Unang adlaw sa klase, sulod sa usa ka classroom sa grade 1 sa Minglanilla Centrall School kaganinang buntag.

Maestra: Sukad karon duha nay inyong balay, ang inyong balay ug dinhi sa inyong eskuwelahan. duha mo ka adlaw magpuyo sa inyong balay ug lima mo da adlaw nga mopuyo dinhi...nakasabot mo mga bata?

Bata: ( mihilak) Di ko mopuyo dinhi...pauli ko sa amo..di ko mopuyo dinhi..waaaaahhh!

Unsaon kaha to pag-am-am sa inahan...mobalik pa kaha to ug eskuwela?

BALIGHO

 Mahulog lang sa limo-limo
Nahimo nang tigmo-tigmo
Kinsay angayan tuhoan
Kinsay naas katarungan

 Ato man gyud ning batasan
Nga motahod sa nangatungdanan
Apan kInsa man gyuy sad-an
Nganong nausab na man ang dagan

Ato untang klarohon
Sinugdanan atong subayon
Kinsay nasakpan kinsay misuwayg tabon
Nganong pagkakaron nabali na man hinuon

Naluoy ko sa mga mibarog
Sa mga nagpakitag kaisog
 Sila na man hinuoy gipakurog
Kay sila kunoy nagpabulabog

Di gyud ta ko manghilabot
Apan di sab ko makatugot
Nga balihon ang kamatuoran
 Di sab ni maayong lingiwan

Dugay na kitang nag-uban
Mga igsoon paryente ug silingan
Naghimo pa silag daotan
Giguba pa atong kahiusahan

Ambot unsay ilang solusyon
Nagduda ra ba silang moguba tas institusyon
Di man kanay atong intensyon
Wa may nagplanong adunay gub-on

Mga libakerog libakera gipasanginlan
Nga maoy nakaingon niining tanan
Sila ra man tay may binuhatan
Ang nangreklamo na man hinuoy daotan

 Hinuon nag-uli na man kuno
 Apan ang nangreklamo papangayuon pa mag pasaylo
Ambot unsa ning pagkatinonto
Usa ka dakong baligho

panaghiuli?

Aduna na diay panaghiuli nga nahitabo.
Nahibalik na diay kuno sa naandang kahimtang

 Ang tanan bang gikuha nagpabiling anaa?
Pagtamod ug pagtahod wa ba kuhaa?

Kumusta na imong pagkabutang
Sa katungdanan mo diin ikaw gitangtang?

Sa kupo, singsing ug sandalyas ka ba gusul-oban
O padayon ka ba gihapong gihuboan?

tagay

nagkidlapkidlap
mga bituon nagsarapsarap
sa akong panan-aw mikuyanap

maayo man gud nakong pagkaparok
nadakin-as sa kahubog ulo ko napukpok

karon nalingaw na ko ug tan-aw
sa mga aninipot na naglutaw
ibabaw sa ulo kong opaw.

apan wala pa ko matagbaw
ugma o sunod adlaw
tagay na pud mga agaw