gugma na ba kini

(LalaKe):
Sa una nakong pagkakita nimo
Naibog dayon ko
Nabihag ko sa imong katahum
Sa imong matam-is nga pahiyom
Gugma na ba kini?


Tungod sa imong kabuotan
kanunay kang naa sa akong hunahuna
Di matukib akong kalipay
Kon ikaw naa sa akong kiliran
gugma na ba kini?

Ang katam-is sa imong halok
Ang kainit sa imong gakos
Kanunayng gipangita sa akong kalag
Gugma na ba kini?

(Babaye):
Kon naibog ka lang
Sa akong katahum
Sa katam-is sa akong pahiyom
Ako kang ingnon
Di pa na gugma, undong

Kon ang akong kabuotan
maoy hinungdan sa kalipay
mong gibati kon ako uban
Kanimo sa imong kiliran
Dili pa kana gugma, undong

Kon halok ug gakos lang
Ang buot mong matagamtam
Ug gugma na sa imong pagtuo
Kanang gibati mo
Dili pa na gugma, undong

(Lalake ug babaye):
Unsa man gyod kining gugma
Unsa ba gyod diay kini
Unsay tamdan aron mailhan
Pinitik ning atong dughan


SUMPAYI NINYO MGA ABAY UG MGA INDAY!
( bisitahi ang gugma 101 usa ka hugpong nga inyong maapilan
didto sa kalubihan )

isimang kuno ang imong panan-aw ngadto sa angay tan-awon

miingon ka
nga molangoy gyod ka
matag pauli mo kada semana

miingon ka
nga wa na kay mahimo ana
kay naa na man gyod

miingon ka
nga wa na gyod kay pagbati
ngadto kaniya

suwayi kuno
sa paghimo ug balak
nga alang gyod niya

kanang balak
sa gugma
nga inyong gipanumpaan

sa palasyo
nga inyong tukoron
ug sa mga prinsepe ug prinsesa
nga inyong
himuong sumusunod
sa gingharian nga inyong ipundar

suwayi ra
ug pamati kon unsay itug-an
sa kaugalingon nimong kalag diha nimo

ug ayaw ko
ug ingna human ni nimo
buhata kaniadto


karon ang akong gipasabot
ug buhata ni sulod
sa duha ka semana

balitai nya ko
kon unsay imong gibati
human ini

balik unyag
suwat ug mga balak
para nako

kon makatuman ka ini
aninawa unsay kalainan

Kaluha

Ang alimyon
sa babayn-on mong kahumot
maoy motultol kanako
ngadto sa tinubdan sa tanang lamdag.

Ang tingog mong mananoy
maoy moganoy kanako
ngadto sa hapsayng luna
nga gigikanan sa tanang pagmahal.

Ang bidlisiw sa kahayag
sa pasiplat sa imong mata
maoy modan-ag sa dalan
nga akong pagasubayon.

Walay makapugong o makapakgang
sa akong paghigwaos nga mahinagbo
ug makauban ikaw.
Tungod kay kitang duha
gilatid nang daan sukad sa sinugdan,
nga mahiusa sa gugma ug kalipay
hangtud sa kahangturan.

Managkaluha ang atong Kalag.

Huwaw

Taud-taod nang walay sagbot
sa daplin sa dalan.

Nagmala na lang ang tunaan..
Nag-uga na ang kahumayan.
Ug wa nay bisan usa ka mais
nga nagbarog sa daruhan....

Nipis na lang kaayo
ang agos sa tubig sa dakong sapa…

Sihag na ang kanhi
huot nga kalibonan.

Nahanaw na ang mga saging
nga nagpunsisok sa tiilan sa bungtod

Uga! Uga! Uga!
Uga ang tibuok kong kalibotan!

Wala nay tubig.
Walay kahoy,
sagbot ug tanom.
Wala nay bulak.

Wala nay bisan gamay na lang nga mugna
nga moturok pa ning akong kasingkasing!

Wala nay bulok ang kinabuhi,
sukad akong nasuta ug nahibaw-an
nga siya ug dili ako
ang matuod mong gihigugma.

pahuway sa ko

Alang sa tanang magbisitahan ning akong payag:

Pasensiyahe lang usa ninyo
nga wa tay bag-ong mga haon karon.
Unsaon wa man ko makahikay,
kay duna pa man koy mahinungdanon
kaayong gipang-atiman.
Agwanta lang una mo sa bahaw.
Naay daghan diha sa abuhan.
Panungkab lang.
Mobalik ra ko...pahuway lang kog kadiyot.

Daghang salamat sa inyong pagpatalinghog....