Saturday, February 28, 2009

gugmang way buling

Didto sa luna
diin mag-abot
ang tanang binuhat
nga mag-ampo,
mamalandong
ug magdamgo,
kita sa kanunay
magkahimamatay.

Sa matag higayon
nga kita magkatagbo didto,
mangagas gikan sa tagsa
nato ka kasing-kasing
ang mga pagbati
nga bug-os ug tiunay.

Ug sa atong pagpauli,
atong bitbit mga bunga
ning mabulukong panagtagbo
- mga balak bulawanon,
mugna sa atong gugma.

Gugmang Balaan.
Walay mantsa.

Friday, February 27, 2009

Praning

Nangalisngaw ang kainit
sa karsadang sementado
nga natandangan sa adlaw
sa udtong utok,
ug nangalisbo ang baho
sa yuta nga nataligsikan.

Mao kiniy hinungdan
sa akong pag-atsi.
Dili ni tungod
kay gihisgotan ko ninyo

Nagngisi samtang naghilak
si Junior Angbo nga naghigop
sa tubig sa kanal.
Ang hinungdan
nga naingon siya niana
dili tungod kay gipadaotan siya.

Nasubhan man gud
ang iyang utok
dihang naligo siya
bisan taas kaayo
siya ug hilanat.

Ang pangutana mao kini.
Nalisoan na ba siyang daan
sa maayong pangisip
dihang nakahukom siyang maligo
bisan gihilantan, o ang pagkaligo
ba maoy nakapaboang niya?

Ambot lang kaha.
Basta gi-atsi ko
dili tungod kay gihisgotan
ko ninyo.
Kinsa man sad kong inyong hisgotan?

Taym pa.
Kinsa man diay
inyong gi-istoryahan,

Si Junior Angbo?

Wednesday, February 18, 2009

ako kana

ayaw tumpaga
kanang pinundok nga balas
daplin sa baybayon
kay ako kanang palasyo

ayaw papasa
ang mga kinuriskuris nga lapis
sa nawong sa bulsita
kay ako kanang palasyo

ayaw gub-a
ang payag=payag nga ginama
sa mga kagingking ug langkay
kay ako kanang palasyo

pasagdi ako nga maglukdo
ug dakong panganod ning gamay kong ulo
nia dinhi ang suga nga mag-iwag kanako
paingon sa akong palasyo

Suga
panganod
palasyo
dugtong sa akong
pagkaako.

Busa ayaw
pasipad-i
kay ako kana.

Monday, February 9, 2009

mao ba?

iya ko nga giadto sa balay
gikasab-an, gisingkahan ug gitulisok
kay ang yuta diay kuno nga akong gitukoran
ug tindahan iyaha, ug buot niyang ipaguba kini
sulod sa duha ka semana.
matud ko: "mao ba?"

giadto ko sa kapitan sa barangay sa amoa
kay naa kunoy reklamo
mahitungod sa akong tindahan.
matud ko : "mao ba?"

Nag-abot mi sa barangay
ug gisubli niya pag-ingon
nga ang akong tindahan
tua nagbarug sa iyang yuta.
Matud ko , Mao ba?

Miadto siya sa amoa
ug nagdala ug mga tawo ,
miingon sila nga ilang gub-on
ang akong tindahan.
Matud ko, "mao ba?"

Ilang gisugdan sa pagguba ang akong tindahan.
ug sa pagtuyok pa nila sa luyo,
ilang nakita ang usa ka mohon
ug nangutana sila kanako kon unsay gipasabot niadto
matud ko utlanan to sa akong yuta. matud nila: "mao ba?"

mipadayon sila sa pagguba sa akong tindahan,
miabot ang ilang amo ug misulti kanako
nga nasayop diay siya kay gisultihan siya sa iyang uyoan nga
ang akong tindahan wa masud sa iyang yuta...

nangayo siyag pasaylo kanako. matud ko: "mao ba?"




tambal sa kauhaw


Karong buntaga,
magkugi kog tigom
ug usa ka basong yamog
- ug imnon ko kini !


ang pagbalik

masinati lang nimo
ang katam-is sa pagpauli
kong ikaw mobiya

iwag

Tultolan
nato ang uban
sa pagbalik
sa ilang kaugalingon
tungod kay
didto nila
matagamtam
ang kaluwasan

agda

aduna koy tanyag kanimo
uban kanako
ug dawata ang akong gugma

biya sa imong kaugalingon
apan pabilin
sa imong nahimutangan

ang akong hangyo mao ra kini
dapita ang uban
sa pagsunod kanimo

panagtagbo


Nagpasalamat ako
nga nagkatagbo kita
dinhi sa tunga-tunga niining
nagsanga nga mga dalan

mouban ka ba kanako
o mopadayon ka ba
sa buot mong adtoan?


pangutana


higala
asa ka
paingon?

nakatultol ka ba?


Friday, February 6, 2009

AKO UG ANG BALAK


Kaniadto
Daan na akong buot magpaila
Apan gidaug sa kauwaw
Busa nagpahipi lang sa tago
Luyo sa pagpakahilum

Karon
Gibuntog ko na ang kauwaw
Ako ania na nagpaila
Samtang nagpahipi sa tago
Luyo ning balak

MASKARA



Matag tawo nagdalag tanghaga.
Matag usa kanato adunay daghang maskara
Depende sa papel nga atong batonan
Sa matag dula nga atong apilan
Ning entablado sa kinabuhi.


Mag-usab usab ang atong mga papel,
Ug uban niini ang mga dayalogo,
Panglihok-lihok ug kinaiya

Sa karakter nga atong huptan
Matag eksina.


Usahay amahan ako, usahay magtutudlo.
May higayon nga ako magwawali,
May higayon nga palahubog.
Usahay lover boy. usahay kumedyante,
Magsusuwat, magbabalak, trabahante...

INGON NIANA
ANG MATAG TAWO,
INGON ANA AKO,
INGON ANA USAB IKAW.


Apan luyo niining mga papel
Sa mga karakter nga atong batonan
Sa nagkalahing higayon,
Nagpabilin ang matuod
Natong pagkakita.


Ug ang magbubuhat ra
Maoy hingpit
nga nakaila
Ug nasayod
Sa dagway
Niini.


Dako natong kaakohan
Ang pagsusi

Sa atong kaugalingon
Aron atong maila
Kung kinsa kita.

Busa padayon
O igsoon,

Sa imong panaw
Pag-ila
Sa imong kaugalingon.

( ug ayaw kalimti
Nga uban kanimo

Niining maong panaw,
Ang Dios
nga nagpuyo sa kahiladman
Sa imong pagkatawo).

Atubang sa samin,
ug ayaw kahadlok
Nga mohubo

Sa imong mga maskara.
Tungod kay, ikaw kanang nakita mo.

IKAW



Lagbas sa kawanangan ug panahon
Way utlanan ang imong kaugalingon

Dinhi ka na sukad masukad
Ug molungtad ka hangtud sa hangtud

Walay ugma ug walay kagahapon
Ang walay kinutoban mong pagkakaron

Di kinahanglan mobiya o mo-eskapo
Tungod kay walay makapig-ot kanimo.

Imo kining uniberso
Kagawasn ang imong apelyedo.