LUNA SA KALIBOTAN

Ako nangita
Sa Propeta nga way dila
Aron maminaw
Sa Iyang mga pagtulon-an

Wala ako moanhi
Aron mamati
Sa inyong mga wali -

Mga pari'ng way U'o !


Palihog
Iway kamo
Ug
Pasagdi Ako.

KARSADA

Karsada -
Sementadong agianan
Niining Siyudad.

Daghang mag-agi-agi
Paingon didto paingon diri
May molabang, mourong
Mopaubay, mopa-atbang.

Samtang ako
Ania sa Eskina
Namasin nga moagi
Ang buotang Propeta.

Karsada
Sementadong dalan
Niining Siyudad.

MGA TUNOB

Ang
mga
Tunob
nga
Akong
Gibilin
sa
Kadalanan
nga
Akong
Giagian
Akoa.

Wala kini ipasikad sa tunob sa uban

Tungod
Kay
Ang
Dalan
Nga
Akong
Gisubay
Akoa
Man
Nga
Binuhat.

KRISTO-ZEN (HAIKUS)

Walay butang nga makaikyas
Sa panan-aw sa taw'ng buta.

Nadungog na sa taw'ng bungol
Ang tanang tingog sa palibot.

Gibutyag na ang tanang kamatuoran
Sa taw'ng hilumon.

Alang sa wa pa makasabot
Hunonga na ang pagtuki.

Ang dalan
Ang kamatuoran
Ang kinabuhi
Imoha.

Ingon nga Ikaw Iyaha
Kamong duha nagkahiusa.

TUAW

Luwasa ako ning akong kahimtang,
Hatagi'g luna intawon ipahimutang.


Mugnaa ako.
Ihimugso sama kanimo.
Ipintal, ikulit, isinggit,
I-awit ug ipaambit,
Haw-asa ako sa kangitngit.

Sa imo unyang paglalang kanako,
Daghang kakulian imong mahinagbo.
Ayaw sila isipang babag,
Hinunoa sila imong kaabag.

Ipatuki ako sa kadaghanan.
Pisa-pisaha, dugmoka, sangaga,
Lahogaya, tumpi-a, hapniga, tumpaga,
Gub-a ug unya ayoha.

Pakadak-i ako,
Pakagubti ug palalisi.
Himoa akong suliran
Ug pangitaig kasulbaran.

Mugnaa ako
Sa way utlanan nga kaamgohan.

Ug unya,
Dihang mahigayon na ug mahimutang,
Mobarog akong gawasnon,
Sa katawhan tahuron...
Pagadayegon !

Panaw sa Kaamgohan

Kalag nahisalaag
Mibulag sa iyang salag
Mipas-an ug balabag
Kay ni Bathala moalagad

Iyang gikahibalag
Usa ka binuhat nagbaragbarag
Sa dalan kini mibabag
Nagpakiluoy nangitag abag

Unya
Gisugdan nila pagbadbad
Kahulogan ilang gihubad
Sa ilang saput sila naghubo
Aron matino matuod nga baho

Ug
Sa ilang pagpadayon
Misanag ang kahimatngon
Makab-ot lang ang himaya
Kung sa kaugalingon sila mobiya

Karon
Sa Ilang pag-uban-uban
Subay sa mangiub nga dalan
Ilang nasabtan ug nasinati
Pagkahiusa dili gayod malugti.

BALAK-AWIT

LUTAW PANGANOD LUTAW


Lutaw panganod lutaw
Padayon sa pag-utaw-utaw
Sakay panganod sakay
Sigeha ang pag-ubay-ubay


Subay subay subay
Lagbas ning kawanangan
Bulahang mugna sa kahitas-an
Walay pagtukol walay paglihay


Walay pagtu-aw
Luwas sa tanang pagbugtaw
Huyop ug bul-og sa hangin
Buot lag dad-on mosugot lag ibilin


Maguba man ang imong bayhon
Gun-ubon ka man o bungkagon
Masinugtanon ikawng motipon
Sa ubang panganod nga sama mo gihapon


Lutaw panganod Lutaw
Padayon sa pag-utaw-utaw